Atención! Chega o último reto, o sexto! Este reto está destinado para o alumnado a partir de 2.º da eso, pero tamén para as familias que así o desexen e o profesorado. Observade o vídeo:
Esta semana, o alumnado de 5.º de Primaria tivo a sorte de poder gozar da compañía dos grandes regueifeiros Caruncho e Pinto. Explicáronnos a orixe das regueifas e amosáronlle ao alumnado a existencia desta arte de improvisación en todo o mundo. Despois, acompañados polo son da zanfona, crearon coplas e tamén as cantaron. Coma sempre, esta é unha actividade chea de humor, risas e o mellor ambiente! Este foi só un primeiro achegamento a esta arte de improvisación oral, pero haberá máis. Parabéns!
Esta semana un grupo de secundaria visitou a Biblioteca Xosé Neira Vilas. Amosáronlles como está organizada a biblioteca e todo o que alí poden facer. O tema da visita este curso é “o libro”, así que coñeceron os diferentes axentes que existen ao redor dos libros, libros sobre libros e remataron a visita elaborando cadanseu libro.
Xa estades no 5.º reto. Estades participando con nós? Enviade os vosos vídeos. Participade acompañados e acompañadas de amigos, familia, profes… Quen quere bailar?
Esta semana volveron visitarnos Pinto e Caruncho, grandes regueifeiros, para seguir traballando coa rapazada na arte da improvisación oral. A sesión comezou rompendo o xeo, presentándose, cantando sobre o que lles gusta… para rapidamente pasar a crear as súas coplas e a cantalas. Nunhas semanas haberá representación do Quiñones no Certame de regueifas.
Xa chegamos ao reto 4. Estás participando? Queremos ver todo o que sabes facer na nosa lingua. Aínda estás a tempo de enviar os teus vídeos dos primeiros retos. Desta volta, queremos comprobar se es quen de cantar. Lanzamos dúas propostas, cal escolles?
