Esta semana un grupo de secundaria visitou a Biblioteca Xosé Neira Vilas. Amosáronlles como está organizada a biblioteca e todo o que alí poden facer. O tema da visita este curso é “o libro”, así que coñeceron os diferentes axentes que existen ao redor dos libros, libros sobre libros e remataron a visita elaborando cadanseu libro.
Xa estades no 5.º reto. Estades participando con nós? Enviade os vosos vídeos. Participade acompañados e acompañadas de amigos, familia, profes… Quen quere bailar?
O alumnado de 4º ESO coñeceu moitas das saídas profesionais que poden ter ao rematar a ESO. Dende distintos ciclos (deseño, artes gráficas, enerxías, canteiría, robótica, etc.) a estudos universitarios tanto presenciais como a distancia (UNED, USC, etc.). Tamén estiveron a Policía Nacional e o Exército, nos que algúns mostraron bastante interese.
Estas semanas de marzo estivemos levando a cabo diversas actividades en torno ao 8M, día internacional da muller. Ed.Infantil e Ed. Primaria colaboramos para elaborar un mural que afastase á muller dos seus papeis estereotipados no mundo laboral para deixar claro que a muller pode desempeñar calquera traballo que ela desexe, ese é o seu superpoder. Tamén participamos en diferentes talleres sobre a igualdade e elaborado algunhas manualidades para regalarlle a unha muller importante na nosa vida.
Esta semana volveron visitarnos Pinto e Caruncho, grandes regueifeiros, para seguir traballando coa rapazada na arte da improvisación oral. A sesión comezou rompendo o xeo, presentándose, cantando sobre o que lles gusta… para rapidamente pasar a crear as súas coplas e a cantalas. Nunhas semanas haberá representación do Quiñones no Certame de regueifas.
